".. حتى تستمتع ربما أكثر اقرأها بالبلدي .. وأنا نفسي أَرَوَّح بلدي ..!!"

وصلني استبيان يسأل عن الشخصية الأكثر شعبية وملوخية في الأراضي الفلسطينية للعام (2012)، وطبعاً صاحبكم أدرك أن الأمر مش بسيط.. وكالعادة يا سعادة قبل اتخاذ قرار اللّطم والتصويت قررت أكون موضوعي بدون غُش ولا تزبيط، لا بَصَوِّتْ لـ هاد عشان كان بالزَّمَنات مناضل عنيد، ولا بَلطُم عَ هاداك عشان صار شيخ كبير بيتاجر بالدين بعد أن كان بقالاً تجوالاً في سوق البلح والتين..!! وحَكيتْ قبل التصويت أحُكْ مصباح علاء الدين يمكن يحكيلي كيف أختار ولمين يكون التصويت.. المُهم حَكّيتْ، يعني، فَرَكِتْ، وحسوَكِتْ، وبعد سبع حَكّات، فاع المصباح وهاج وانتفـخ.. وفجأة طلع العفريت.. شبّيك لُبّيك وكلام عفاريت.. مع الخوف، تَفّييت، تَفّه عَ اليسار، وتَفّه عَ اليمين، وعَ السريع شكيتلو حالي، وشو أعمل بــ هالشخصيات.. ودير بالك لازم اختار واحد من هالقيادات.. مِسِكْ عفريتنا الورقة.. قرأ الأسماء ركبـوا عفريت..!!
 
على رأس القائمة "أبو سلامة أولاده"، مش فاتح حساب لليوم عَ الفيس بُوك واكتفى بـ فتح غزّة وفَتَح مصنع بلوكْ..!! الثاني فاهم وعارف إنّو الناس في الناس صارت تحُكْ ومع قلة الرواتب مُخها رايح يطُك..!! والثالث إنتو عارفينـو المشخِّص دايماً ما غيرُه بعد الانفصال زاد عشرة كيلـو..!! والرابع ارجعوا ورا خَلّو تيته تحكيلو كيف عملها عَ حاله.. "إفْ".. وعملوها بعدو.. "تُوتْ".. ومزرعة كبيرة ع حساب الوطن وسنينُه..!! والخامس غاطس في سريرُه، إذا صار حَكي عن الحوار فوراً ع القاهرة طار.. وحياتكم لو راحت عليه نومه بالمطار.. فيه ومن غيرُه ماشي القطـار.. هنا نطق العفريت.. حكالي يا حمار أي قطار، المصالحة، صارت فُشَـار..!! المُهم.. السادس مرصُوص رصّ، ويا حرام قَعد عَ الرَّفْ، عتبان عَ "بُوبوس" بعد ما شَلَّحُوه من المُولد بَلا حُمص..!! أما السابع فَـ وجهُـه بيقطع الخميرة ما غيرُه.. تقُولش أخوه لزاباتيـرو.. إذا صرّح يا منيَّل تصريح فاعت عليك بواسيـرُه..!! الثامن مش عارف شَرُّه من خيرُه ضد المصالحة، لَزقه بالكرسي، وصعب تشيلُـه..!! والتاسع الانقسام شلَّحُوا كمان وكمان بَان أندر ويـرو..!! والعاشر بدون مايك بتسمع مزاميرُه في الداخل والداخلية حبايبُه بيحكولك الله يكفيك مساميـرُه..!! طار العفريت يا ولآد.. وما أعطاني الجواب ما غيرُه.. هاداك تبع قيادات الوطن وتواليلُـه..!! ويلاّ طيـرو، شخصيا رايح أصوِّت لـ بربـور الوطن ومناخيـرُه، وأُحَمِّل المسؤولية كاملة للعفريت ابن العفريت اللي تركني وحيد بدون ما يحكيلي وأحكيلكُم وأحكيلُه.. مَنْ هي الشخصية الأكثر شعبية وملوخية في مستنقع الانقسام وبقايا الوطن للعام (2012).. كل عام وأنتم في هالبلد مش عارفينـو.. واللّي عِرِفْ يا ريت يِحْكِيْ بـ سِـرُّه، ويضُب عِلْمُـه في "بَطُّوطِـة" غيـرو..!!